Dredging Corporation of Rama


Dredging Corporation of Rama

ஏற்கனவே ராமர் பேரைச் சொல்லி ஏகப்பட்ட சிக்கல்லெ ஒரு சேது சமுத்திரத் திட்டம் இருக்கு. அதுவும் அந்த Dredging – அதாங்க கடலை ஆழப்படுத்தும் வேலைதான் சிக்கலின் உச்சம். இதிலெ ராமரே ஏதோ தோண்டும் கம்பெனி வச்சி நடத்துற மாதிரி இதென்ன
டைட்டில்?

அதுக்கு முன்னாடி ஒரு Objection.

எப்பவுவே ஏதாவது கலாச்சிட்டதுக்கு அப்புறம் தான் ராமர் கம்பர் வருவாங்க… இன்னெக்கி என்ன உடனே அப்பியரன்ஸ்??

சரி.. கலாய்ச்சிட்டு அப்புறம் வருவோமே..??

1987 களில் கடலுக்கு அடியில் உள்ள மண் சோதனைக்காக (Boring work – sub soil
investigation) ஒரு தீவுக்கு போயிருந்தேன். அடிக்கடி சினிமாவில் காட்டும் மேன்ஷன்
பாணியில் ஒரு கும்பலுடன் தங்க நேர்ந்தது.

பஞ்சதந்திரம் படகும்பல் ஸ்டைலில் மக்கள் செமெ ஜாலியாய் இருந்தார்கள் (பெண்கள்
விஷயத்தில் எல்லரும் ராமர் மாதிரி)

முதல் கேள்வி : (ராகிங் பாணியில்) நீ என்ன பண்ண வந்த ஆளு சொல்லு..?

(கேள்வியே எனக்குப் புரியலை… கொஞ்சமா தைரியத்தை வரவழைத்து)

நீங்க என்ன என்ன பண்ற ஆளுஙக? கேட்டேன்.

வந்த பதில் பட்டியல்.

குத்துற ஆளு (Post Office வேலை – ஸ்டாம்ப் மேல் குத்துவதால்)
சொறுகுற ஆளு ( Telephone Exchange – connection தருவது)
அடிக்கிற ஆளு (வாத்தியார்)
புடிக்கிற ஆள் (X Ray Technician – படம் புடிப்பவர்)
விக்கிற ஆளு (கடை வைத்திருப்பவர்)

இதே ஸ்டைலில் பதில் சொல்லணுமாம் நானு.

சொன்னேன் என் வேலையை. அவர்கள் பெயர் வைத்தார்கள்

கொடையிற ஆளு என்று. சந்தோஷமாய் ஏற்றுக் கொண்டேன்.

சரி குடைதல் என்பதை Boring என்பதாய் வைத்துக்கொண்டால் Dredging க்கு என்ன சொல்வது

தோண்டல், ஆழப்படுத்தல், கடலை ஆழப் படுத்தல், கடலை தூர் வாருதல்..இப்படி ஏதாவது இருக்கட்டும்.

இப்ப ராமர் கம்பரை கொண்டு வரட்டுமா??

ராமர் Dredging செஞ்சிருக்காரா??

இதென்னெ கேள்வி சின்னப் புள்ளத் தனமா இருக்கே? என்று வடி வேல் ஸ்டைலில்
கேக்கிறீங்களா…

நீங்க தைரியமான மனிதரா..??

ஆமாவா…

இந்தா புடிங்க மொபைலை.. லையன்ல இருக்கிறது யாரு தெரியுமா??

விசுவாமித்திரர்..

கோபம் வந்தா சாபம் குடுத்துடுவாரா??

அப்பொ நானே பேசட்டா..??? … ம்.. அவரும் நம்ம பிரண்டு தான்.

நான்: ஹலோ.. விசுவாமித்திரருங்களா…???

விமி : யார்ரா அது என் நம்பருக்கே போன் போட்டு நான் தானான்னு கேக்குறது??

நான்: கோவிச்சுக்காதீங்க சாமி.. உங்க சிஸ்ய புள்ளைங்க யாராவது போன் எடுப்பாங்கன்னு கேட்டேன் சாமி..

விமி : ஆமா.. நீ யாரு சொல்லவே இல்லெ…

நான் : நான் தானுங்க..  இந்த wordpress லெ கம்பராமாயணம் பத்தி கொஞ்சம் கலாய்க்கிற
பார்ட்டிங்க..

விமி: ஓ..ஹோ..அந்த பார்ட்டியா? சரி..என்னெ வச்சி காமெடி கீமடி பண்ணலையே?

நான்: உங்களை கலாய்க்க முடியுமா? ஒரு சின்ன கேள்விங்க.. ராமன் Dredging
செஞ்ச்சிருக்காரா??

விமி: இது கூட தெரியாம எழுத வந்திட்டியா?? ஜனகன் கிட்டெ ராமரைப் பத்தி சொல்றப்பொ என்ன சொன்னேன் தெரியாதா??

நான்: தெரியலையே சாமி:

விமி: அஸ்வமேத யாகத்தைக் காக்க, மேடும் பள்ளமுமா இருந்த நிலத்தை சீராக்க.. கடலை தோண்டினார் ராமர்.

நான்: அப்படியே அந்த கம்பர் பாட்டு சொன்னீங்கன்னா நல்லா இருக்குமே

விமி: என்ன வெளையாட்டா… மனுஷன் 10000 பாட்டு எழுதியிருக்கான்.. எவன் ஞாபகம் வச்சிருப்பன். போனை வை.. மெயில் பண்றேன்..

நான்: சாமி.. pdf லே அனுப்புங்க சாமி … பாண்ட் பிராபளம் வரப்போகுது…

விமி: இப்பொ போனை வைக்கப் போறியா.. சாபம் தரட்டுமா..

நான்: டிக். (அப்பா.. மனுஷன் கிட்டெ சாபம் வாங்காமெ பேச என்ன பாடு பட வேண்டி இருக்கு???)

Pdf ல் கிடைத்த பாடல் இதோ:

இடறு ஒட்ட இன நெடிய வரை உருட்டி இவ்வுலகம்
திடல் தோட்டம் எனக் கிடந்த வகை திறம்பத் தெவ்வேந்தர்
உடல் தோட்ட நெடு வேலாய் இவர் குலத்தோர் உவரி நீர்க்
கடல் தோட்டார் எனின் வேறு ஓர் கட்டுரையும் வேண்டுமா??

ராமர் தோண்டினாரோ இல்லையோ நான் இன்னும் கொஞ்சம் கம்பராமாயணத்தைத் தோண்டனும்.

கா…கா…கா… காக்கா பிடிக்கலாமா?


எனக்கு மட்டுமல்ல..உங்களில் அனைவருக்கும் பிடித்த விவேக் காமெடி..” அஞ்சி ரூபா பிரியாணி துண்ணா.. காக்கா குரல் வராம… உண்ணி கிருஷ்ணன் குரலா வரும்?”

ஆக அந்த அஞ்சு ரூபா பிரியாணி தயார் செய்பவன் காக்கா பிடிக்கலாம். ஆனா நாம காக்கா பிடிக்கலாமா??

என் அலுவலகத்தில் திடீர் என்று சில டை கட்டிய ஆசாமிகள் ஆஜர் ஆவார்கள். (எனக்கு என்னமோ இந்த டை கட்டுவது என்றால் பெரிய அலர்ஜியாய் இருக்கு). சம்பிராதயமான விசாரிப்புகள் தொடரும். ஹிந்தியிம் English ம் கலந்து போசுவோம்.. கடைசியில், சார் நீங்க தமிழ் நாடா? என்ற கேள்வி வரும். ஆமாம் என்றால் உங்களைப் பாத்தா தமிழர் மாதிரி தெரியலை சார்.

அப்படியா… இந்த ஆச்சரியம் நான் என் முகத்தில் காட்டியாகனும்.. (கொஞ்சம் வெட்கம் கலந்த சந்தோஷத்தையும் காட்டி நடிக்கவும் வேண்டும்)

ஆமா.. நானு உங்களை ஏதோ வட நாட்டவர் என்று நினைத்தேன்…

சரி..என்ன வேலையா வந்தீர்கள்??

அப்புறம்  வந்த வேலை தொடரும்..

இதில் காக்கா வந்து உக்காந்ததைப் பாத்தீகளா??

இல்லையா?? இன்னொரு ஆள் வருகிறார். அவரைப் பாருங்க..

சார் கம்ப்யூர்லே நீங்க பின்னிப் பெடலெடுக்கிறீங்க.. (எனக்கு தெரிந்த கணிய அறிவு என் பையன் படிக்கும் 7ம் வகுப்பிற்கே உதவுவதில்லை..இது தான் உண்மை)

தமிழ் எல்லாம் கம்ப்யூட்டர்லே எழுதுவீங்களாம் இல்லே?? . எப்படி சார்??  RTI  யாருக்கும் பயனில்லை என்று நினைக்கிறேன்… நீங்க என்ன நினைக்கிறீங்க???

இதுக்கு என் பதில் தொடரும்…

ஐந்து பத்து நிமிடங்களுக்குப் பின், என்ன விஷயமா வந்தேன்னா… இனி தான் ஆரம்பிக்கும்.

சில நபர்கள் பேச்சு ஆரம்பிப்பதற்கு முன்பு கடைபிடிக்க வேண்டிய நடை முறைகள் என்று பக்காவான டிரைனிங்க் எடுத்த ஆட்களும் உண்டு.

இந்த காக்கா தேவை தானா..? நேரடியாக விஷயத்தை ஆரம்பித்தா என்ன ஆகும்?

Starting Trouble இல்லாம வண்டி ஓட இந்த காக்கா தேவைப்படுது. அல்லது பல்ஸ் பாத்து பேசுன்னு அவங்க ஊரு அவ்வை சொல்லி இருக்கலாம்.

இந்த விஷயத்தை இப்படிப் பாத்தா என்ன??

கல்யாணம் செய்யாம இருக்கிறப்போ கஷ்டமா இருக்கும். காதலியை சந்திக்கும் இடம் சந்தோஷம். கல்யாணம் செஞ்சிகிட்டா ஜாலி தான்.. கொஞ்ச நாள் போனா அப்புறம் பிரச்சினனைகள் வரும்.. கஷ்டம் தான். சரி மனைவி பிரிந்து போனால், அதுவும் சிரமம் தான். (ஐந்தில் மூன்று கஷ்டம்)

ஆக சந்தோஷமான ஒரே தருணம்… அந்த “வரும் நேரம்” தான்… “சந்தித்த வேளையில்” என்பார்களே.. அதை கொஞ்சம் கலகலப்பாய் ஆக்கும் முயற்சி தான் இந்த காக்கா என்கிறேன் நான்.

தேவாரத்தில் சுந்தரர் சிவனை ஐஸ் வைத்திருக்கார் தெரியுமா?? மத்தவங்களை விட இந்த மனுஷன் அதிகமா ஐஸ் வச்சாகனும்… ஏன்னா..பித்தா என்று கண்ணா பின்னாவா சாமியையே திட்டுன நபர் இவர்.

பொன்னார் மேனியனே என்று ஆரம்பிக்கும் பாடலில் கடைசியில் “அண்ணே நின்னையல்லால் யாரை நினைப்பேனோ..??” என்று பாடி கொஞ்சம் சமாளிக்கிறார்.

என்ன…காக்கா ஐஸ் சமாச்சாரம் ஜீரனிக்க முடியவில்லையா??

நீங்க ஒத்துக்க மாட்டீங்களா??

ம்… ராமாயணத்திலேயே இப்படி காக்கா… ஐஸ் வைத்த இடம் இருக்கு… அதை சொன்னா நம்புவீங்களா..

கம்பரே நம்ம கட்சிங்க… வேற எந்த கொம்பரும் ஒண்ணும் கேக்க முடியாது…

விசுவாமித்திரர் அயோத்திக்கு வருகிறார் ஏதோ வேலையா… அதுவும் ராஜாகிட்டே.. இவரோட கோபம் தான் நம்ம நாசரோடோ மூக்கு மாதிரி உலகத்துக்கே தெரிஞ்ச சேதியாச்சே?? அப்போ தசரதனுக்கு தெரியாம போகுமா?? ஐயா ஆர்டர் போட்டா அதுக்கு அப்பீலே கிடையாது.

இருந்தாலும் முனி ஆரம்பிக்கிறார் இப்படி: ஏன் இங்கே வந்திருக்கேன்னு பாக்கீகளா?? என்னைய மாதிரி முனிகளுக்கும் ஏன் தேவர்களுக்கும்  ஏதும் வேணும்னா, நாங்க போறதுக்கு எங்கே போக்கிடம் தெரியுமா??

மத்த மலையைப் பாத்து சிரிச்சி விளையாடும்  கயிலை மலை, பாற்கடல், பிரம்மாவோட சத்தியலோகம்..கற்பக மரங்களை உடைய அமராவதி நகரமும்…….. ஒண்ணு வுட்டேனே… அழகிய மாளிகையினைப் பெற்ற இந்த பொன்மயமான அயோத்திக்குத்தான் போவோம்…

இப்போ எதுக்கு வந்தேன்னா…. அப்புறம் தான் வந்த காரியம் ஆரம்பிக்குது.. விசுவாமித்ரருக்கே பல்ஸ் பாத்து பேசும் இயல்பு இருக்கறச்சே… நமக்கெல்லாம் வேணாமா??

 என் அனைய முனிவரும் இமையவரும் இடையூறு ஒன்று உடையவரானால்

பல் நகமும் நகுவெள்ளிப் பனிவரையும் பாற்கடலும் பதும பீடத்து

அந் நகரும் கற்பக நாட்டு அணி நகரும் மணிமாட அயோத்தி என்னும்

பொன் நகரும் அல்லாது புகல் உண்டோ இகல் கடந்த புலவு வேலோய். 

 

நீதி: காக்கா பிடிங்க… காக்கா பிடிப்பதே தெரியாம பிடிங்க…

உங்களிடம் யாராவது வந்து காக்கா பிடித்தால், அது உண்மைன்னு மட்டும் நம்பிடாதீங்க…தள்ளி நின்னு ரசிங்க… ஜாலியா இருக்கும்.