திருட்டு மாங்கா புளிக்குமா??


அறிஞர் அண்ணா மாற்றான் தோட்டத்து மல்லிகை மணக்கும் என்று சொன்னாலும் சொன்னார். அதனை நம் மக்கள் எல்லாருமே, ரொம்பவே சரீய்யா தப்பா புரிஞ்சி கிட்டாய்ங்க போலத்தான் எனக்குப் படுது. (ஒருவேளை இப்படி அர்த்தம் படும்படி இருந்திருந்தா, அவரு இந்த மாதிரி சொல்லாமலேயே இருந்திருப்பாரோ !!!!) அறிஞர் அதுவும் பேரறிஞர், அவரோட பேச்சுக்கு இந்தப் பாமரன் எல்லாம் அருஞ்சொல் பொருள் விளக்கம் மாதிரி சொல்ல முடியுமா என்ன?

எதிர்க் கட்சியை, எதிரிக் கட்சியா நெனைக்கப் படாது என்பது தான் இந்த வாசகத்தின் அடிநாதமான உண்மையின் குரல். (அடுத்த வீட்டுக்காரன் வட நாட்டானாக இருந்தாலும் சரி, சூப்பர் பிகர் ஏதாவது இருக்கா பாரு என்று சொல்வது தான் இன்றைய நவ நாகரீக வடிவம்). எதிரிகளை விரோதிகளாய் நினைக்காமல், அவரிடம் கூட ஏதாவது நல்ல குணங்கள் இருந்தால் அதைப் பேச வேண்டும் என்ற நல்ல கருத்துக்காக சொன்ன சேதி…ஆலோசனை எங்கே போச்சு?? கனி இருக்கும் போது காய் பற்றி என்ன பேச்சு வேண்டிக் கிடக்கு என்று தானே வள்ளுவரும் ரெண்டு வரி எழுதி வச்சாரு?? நாமும் இனி பழம் நோக்கியே காயை நகர்த்துவோம்.

ஆமா… காய் நகர்த்தல் என்கிறார்களே??? அப்டீன்னா?? அந்த காலத்திலெ காய் வைத்து ஆடிய ஆட்டங்கள் அதிகமாய் இருந்திருக்குமோ?? தாயம், ஆடு புலி ஆட்டம், செஸ் என்று இப்போதைய பெயரில் விளங்கும் சதுரங்கம், பரமபதம் இப்படி எல்லாத்துக்கும் காய் நகர்த்தல் தான் முக்கியமான மூவ். (பாவம்.. இந்தக் காலத்தின் வீடியோ கேம் மட்டுமே விளையாடத் தெரிந்த இளைய தலைமுறைக்கு… இந்த காய் வைத்து விளையாடும் விளையாட்டுகள் பற்றிய பெயர் கூட தெரிந்திருக்க வாய்ப்பே இல்லை) ஆனாலும் இந்த காய் வைத்து ஆடும் எல்லா ஆட்டங்களும், ஆரம்பம் ரொம்பவே டல்லு தான் (ஃபேஸ் புக்கில் கூட இப்படி ஆரம்பம் டல்லாத் தானே இருக்கு… அப்புறம் ஆராவாரம் தானே?)

நாம செய்யிற ஒவ்வொரு காரியத்தையும் நமக்கு சம்பந்தமே இல்லாத ஒரு விஷயத்தோடு சம்மந்தா சம்மந்தமில்லாமல் சம்பந்தப் படுத்திப் பேசுகிறோமே?… கேட்டிடுருக்கீகளா? இப்படித்தான் ஒரு நாள் ஏதொ பேசிக்கொண்டிருந்தோம். பல்லி அடிக்கடி கத்தியது. அது என்னோட அரட்டைக்காரனுக்கு செமெயா பாதிச்சது. (எனக்கென்னவோ அந்தப் பல்லி குஜாலா, நேத்து ராத்திரி யம்மா என்று பல்லி பாஷையில் பாடுவது போல் இருந்தது.) அத்தனைக்கும் அவரு டாக்டர் வேறு. நோயாளிக்கு ஏதாவது பிரச்சினையா?? போன் போட்டு விசாரிக்கிறார்… அவரால் நிம்மதியாக இருக்க முடியலை.. அரசு மருத்துவர் இவ்வளவு அக்கறையோடயா?? என்று மனதுக்குள் பல்லி கத்துது. நட்ட நடு ராத்திரியில் (இரவு 11 மணி தானுங்க.) நாய் வேறெ கத்திச்சா??? அவரு அப்செட் ஆகி தூங்கப் போயிட்டார். அடுத்த நாள் அந்தமான் தீவில் 4.8 அளவில் பூகம்பம் வந்த செய்தி தெரிந்தது. பல்லிக்கும் நாய்க்கும் தெரியுது… நமக்குத் தெரியலையே?? ஆமா 30 நளில் பல்லி பாஷை கத்துக்க புத்தகம் ஏதும் இருக்கா??

நாய் வித்த காசு குரைக்காது என்பார்கள். அதே போல் ஒரிஜினல் மாம்பழத்தை விடவும் திருட்டு மாங்காய்க்கு ருசியே தனி தான் போலிருக்கு. ஒரு வேளை இலவச இணைப்பு என்பது நமது கலாச்சாரத்தில் ஊறிப்போய்விட்ட விஷயமா ஆயிடுச்சோ? தாளிக்க சட்டி கிடைக்கும் என்பதற்காகவே ஏகப்பட்ட எண்ணெய்கள் வாங்கிய திருமதிகள் பலரில் என் தர்ம பத்தினியும் அடக்கம். (ஆனா அந்த தாளிக்கும் பாத்திரம் அத்தனையும் ஒரு தடவை கூட உபயோகப்படாமல் அப்படியே அடுப்பங்கரையில் தூங்கும் என்பது வேறு விஷயம்.) அந்தக் காலத்தில் பலசரக்குக் கடையில் சாமான் வாங்கினால். அம்மாவின் முந்தானையை பிடிச்சிட்டு கூடவே வரும் வாண்டுகளுக்கு அச்சு வெல்லம் அன்பளிப்பா கிடைக்கும். (அதுக்காகவே அம்மா பிள்ளை ஆனவன் நான்) அது டேஸ்டே தனி தான்.

தயிர் எவ்வளவு தான் வாங்கினாலும், அதில் கொஞ்சமாவது கொசுறு இல்லாட்டி கதையாவாது என்பது தனிக்கதை. இலவச இணைப்புகள் தான் மெயின் புத்தகத்தை விட நல்லா இருக்கு. மனிவியுடைய தங்கையை இலவச இணைப்பு என்றும் அழைக்கலாமா?? அவர்களுக்கு திருமணம் ஆகும் வரை… எப்படியோ… ஏதோ ஒன்று, சும்மாவோ அல்லது திருட்ட்டுத் தனமாவோ கெடைக்கிறது சுகம்மா இருக்கு. ஏன் இப்படி ஆயிடுச்சி??

தப்பு செய்வவர் தைரியமா, சந்தோஷமா இருக்காய்ங்க… நீதி நேர்மை நாட்டுக்கு நல்லது, நாலு பேத்துக்கு நல்லது செய்யலாம்னு நெனைக்கிறவங்க பயந்து பயந்து, நொந்து நூலாகி இருக்காங்களே?? எங்கேயோ தப்பு நடந்திருக்கே?? இன்னொரு விஷயம் நம்ம நாட்லெ தான் விதி மீறல் செய்வது கௌரவமான செயலா பாக்கப் படுது. ரூல்ஸ் ஃபாலோ பன்றவய்ங, பொழைக்கத் தெரியாதவங்க லிஸ்ட்லெ வந்திடுவாங்க. தப்பு செய்தால் தம்பியா இருந்தா கண்டிக்கலாம். அண்ணன் தப்பு செய்தா??? தம்பியும் சொல்லிக் காட்டலாமா??? ….மே… காட்டியிருக்காங்கலே… இப்பொ கம்பர் எண்ட்ரி ஆகிறார்.

கும்பகர்ணன் இரவணராஜாவோட அன்புத் தம்பி.. என்ன.. எல்லாத் தம்பிகளும் துக்கமா இருப்பாய்ங்க. இவரு கொஞ்சம் தூக்கமவே இருப்பார். அவ்வளவு தான் வித்தியாசம். அவரும் ஒரு நாள் ராஜாவெப் பாத்து சொல்றார்.. ஓவியங்கள் அதிகமா இருந்த நம்ம ராஜ்ஜியத்தெ தீ வந்து சாப்பிட்டுப் போயிடுச்சி…( தீ அழிச்சிடுச்சி என்று நெகட்டிவா சொல்லலை, கம்பர். தீ சாப்பிட்டு விட்டது என்று பாஸிட்டிவா சொல்கிறார்.) நல்ல குடியில் பிறந்த மாற்றான் தோட்டத்து மனைவியை சிறை வச்சியே…நல்லதா அண்ணா??( மோசமான குடியில் பொறந்த ஆளு கூட சகவாசம் வச்சிருந்தா பரவாயில்லையா கும்பண்ணே???)

ஓவியம் அமைந்த நகர் தீ உண உளைந்தாய்
கோவியல் அழிந்தது என வேறு ஒரு குலத்தோன்
தேவியை நயந்து சிறை வைத்த செயல் நன்றோ
பாவியர் உறும் பழி இதின் பழியும் உண்டோ?

கும்பகர்ணன் நல்லவரா கெட்டவானா என்று பட்டிமன்றம் வச்சா, இனி மேல் நீங்க நல்லவர்னு ரொம்ப தைரியமா பேசலாம்.

அவனா நீ???


இன்றைய படங்களையும் காமெடி காட்சிகளையும் தொடர்ந்து பார்த்து வந்தால் ஓர் உண்மை தெளிவாகப் புரியும். அவைகள் ஒரு வகையில் நம் சமூகத்தோடு ஒன்றாகக் கலந்து போய் உள்ளன என்பதும் தான், நான் சொல்ல வந்த சேதி. சில வார்த்தைகள் திரைப்படங்களில் “சினிமாவில் பயன்பாட்டிற்கு முன்” மற்றும் “சினிமாவில் பயன்பாட்டிற்கு பின்” என்று சொல்லும் அளவுக்கு மாறியே போய் விட்டன. வருங்கால வரலாறு இதனை கிமு கிபி என்று அழைப்பது போல், சிமு சிபி என்று சொன்னாலும் ஆச்சரியப் படுவதற்கு இல்லை.

இப்பெல்லாம் “அவனா நீ?” என்று யாரையும் சாதாரணமாய் கேட்டுவிட முடியாது. கேட்டால் அதனால் உண்டாகும் பாதகங்களுக்கும் அவர்களே பொறுப்பு ஏற்க வேண்டி வரும். அடுத்தவர் மனம் கோணாது நடப்பது என்பது ஒரு கலை. அது சிலருக்கு பிறப்பிலேயே வரும். சிலருக்கு என்பது வயது தாண்டினாலும் வராது. கோவை பக்கம் சூப்பரான ஒரு வட்டார வழக்கு இருக்கு. சுட்டுப் போட்டாலும் வராது என்பார்கள். ஏன் தான் இப்படி சொல்கிறார்கள் என்று எனக்கு இன்னும் சுட்டுப் போட்டாலும் புரியலை.

சமீபத்தில் அலுவலக அதிகாரிகள் அடங்கிய குழுவுடன் ஒரு சின்ன உல்லாச விருந்துக்கு ஏற்பாடு ஆனது.. (உல்லாசம் என்றவுடன்.. உங்கள் கற்பனை சிறகுகள் எல்லாம் பறக்க விட வேண்டாம்.. ஏதோ வீட்டுல உக்காந்து சாப்பிடறதுக்குப் பதிலா, ஹோட்டலில் போய் நின்னுட்டு சாப்பிட்டு வர வேணும் அம்புட்டு தான். பில்லுக்கும் பல்லிளிக்கும் நபருக்கும், வாசற்கதவு திறந்து சலாம் வைப்பவருக்கும் பணம் தரவேணும் என்பது எழுதப்படாத விதி).
சில ஜாலியான குடும்ப விளையாட்டுகள் வைத்தோம். பேப்பர் கப் என்று கிடைக்கும் 25 கப்களை ஒன்றாக அடுக்கி, அதனை வலது & இடது என்று கை மாற்றி மேலிருந்து எடுத்து கீழாய் அடுக்க வேணும். கணவன் மனைவி ஜோடிகளுக்கு இடையே போட்டி நடந்தது. போட்டி போட்டு நடந்த போட்டியின் முத்தாய்ப்பாய், அன்று ஓய்வு பெறும் அதிகாரியை அழைத்தோம். பொறுமையாய் தன் மனைவியை சற்றும் விட்டுத் தராமல் மனைவிக்கு சமமாய் கப்களை நகர்த்தி ஒரு நிமிடத்தில் விளையாட்டை முடித்தார். இறுதியில் சிறந்த ஜோடிக்கான சிறப்பு பரிசை தந்தோம் என்பது கொசுறுத் தகவல்.
மனைவியின் மனம் வருந்தி விடக் கூடாதே என்பது ஒரு பக்கம் இருக்கட்டும். முகம் தெரியா விருந்தினர்களையும் உபசரிக்க திண்ணை வைத்து வீடு கட்டியது அந்தக் காலம். உழைப்பாளிகளின் சுமைகளை இறக்கி வைக்க, சுமை தாங்கி எல்லாம் இருந்தது. குடிக்க தண்ணி கேட்டால் செம்பு நிறைய கிடைத்தது ஒரு காலம். இப்பொ பாக்கெட் தண்ணி வாங்கி குடிக்கும் காலம். அடுத்தவர் பற்றி நமக்கு அக்கறை குறைக்கும் வித்தை மிக அக்கரையோடு கற்பிக்கப் படுகிறதோ!!!

காக்கை வடை திருட்டும் கதை, நரி காக்கையை ஏமாற்றும் கதை இவை எல்லாம் நமக்கு கிடைத்த பால பாடங்கள். ஏமாற்றுவது என்பது ஒரு தவறு இல்லை என்று அந்த பிஞ்சு உள்ளங்களில் பதிந்து விட்டது. நடுவில் சினிமா படங்களும் சில தத்துவங்களை மனதில் பதிக்கின்றன. நாலு பேருக்கு நல்லது என்றால் எதுவுமே தப்பில்லை – போன்றவை சாம்பிள் சினிமா தத்துவங்கள். நேர்மை நியாயம் எல்லாம் அந்தக்காலத்து நாடகம் & சினிமாக்களில் மட்டுமே பாக்க முடிகிறது.

இப்பேற்பட்ட சூழலில் நம்மை யாராவது மனசு நோகடிக்கும்படி செய்தால் அல்லது பேசினால் கஷ்டமாத்தான் இருக்கு. அதை எப்படி சமாளிப்பது என்பது அவரவர் சாமர்த்தியம். ஆனா இதே சங்கடத்தை அடுத்தவர்க்கு நாம் தராமல் இருக்கலாமே?? மாமியார் மருமகள் கொடுமை, ராகிங்க் போன்றவை ஒழிய இந்த மனோபாவ மாற்றம் தேவை. ஒரு புரமோஷன் கொடுக்க உயர் அதிகாரிக்கு வலிக்கிறது. ஏன் என்று கேட்டா, அவருக்கு இப்படி லேசா கெடைக்கலியாம்??? கோர்ட்டுக்கு எல்லாம் போய் தான் கெடேச்சதாம்.. அதனாலெ.. அடுத்தவங்களுக்கும் லேசிலெ தரமாட்டாராம்..
நான் செருப்பு கூட இல்லாமல் ஸ்கூலுக்கு போனேன். நடந்து தான் போனேன். நானும் இப்பொ என் பையனையும் “செருப்பில்லாமெ போ” என்று சொல்லவில்லையே… நல்லதா ஷு வாங்கி தரலையா?? காரில் போக வசதி செய்து தரலையா?? இதே மாதிரியான எண்ணங்கள் வேலை செய்யும் இடத்திலும் இருக்கலாமே என்பது என் கருத்து..
நல்லா இரு… என்று சொல்வதும், நல்லா வருவே என்று சொல்வதும் கூட சினிமாவில் வேறு பொருள்.. சரி.. நாம கம்பர் இந்த மாதிரி சமாசாரம் ஏதாவது சொல்லி இருக்காரா என்று தேட ஆரம்பிக்கலாமா என்று தேடினேன். தேடினால் கிடைக்காமல் போகாது என்பது சரி தான் கிடைத்தது.
ஹனுமன் நெற்றியில் ஒரு Spy Camera வச்சிட்டேன். அவரு என்ன பேசுகிறார் யோசிக்கிறார் (??) பார்க்கிறார் வரைக்கும் நீங்களும் பார்க்கலாம். ஆனா சிந்தனையின் Copy Right மட்டும் கம்பருக்கு. இலங்கையின் ஏரியல் வியூ தெரிகிறதா உங்களுக்கும்?? பிரம்மாண்டமான அரண்மனை… சுகமான நித்திரையில் ஒருவன். ஹனுமன் பார்க்கிறார். “அவனா நீ?” (இராவணனா நீ என்று தான் பொருள்??) அப்படியே இருந்தாலும் இன்னும் கொஞ்ச நாள் தானே ஆயுள்.. அது வரை.. நல்லா இரு என்று ஆசி செய்து நகர்கிறார். செவிக்கு தேனாய் இனிக்கும் இராமனின் புகழினை திருத்தமாய் சொல்கின்ற வானரத் தலைவன் வாயால் வாழ்த்தினால் பலிக்காமலா போகும்!!
அவித்து நின்று எவன் ஆயினும் ஆக என்று அங்கைகவித்து நீங்கிடச் சில பகல்என்பது கருதாசெவிக்குத் தேன் என இராகவன் புகழினைத் திருத்தும்கவிக்கு நாயகம் அனையவன் உறையுளைக் கடந்தான்.
இனி மேல் வாழ்க வளமுடன் என்றாவது சொல்லிப் பாருங்கள்.. அவங்களோடு நீங்களும் நல்லா இருப்பீங்க..

மாற்றான் தோட்டத்து மல்லிகை


இந்த மந்திரத்தை தமிழ் கூறும் நல் உலகிற்கு தந்தவர் அறிஞர் அண்ணா. அவரது கருத்துக்களை திராவிட இயக்கம் சார்ந்தவர்கள் மட்டுமே முழுதாய் கேட்பவர்களாய் இருபந்தாலும் கூட, இந்த “மாற்றான் மல்லி” டயலாக்கை எல்லாரும் கண்டிப்பா யூஸ் செஞ்சிருப்பாய்ங்க.

ஆனா இதை பேரறிஞர் எந்த அர்த்தத்தில் சொன்னாரோ அதை மட்டும் சரிய்யா, எல்லாரும் தப்பா புரிஞ்சிக்கிட்டாய்ங்க. பக்கத்து வீட்டு பொண்ணை ஒரு வாலிபன் சைட் அடிக்கனுமா?, அடுத்த வீட்டு அக்கா பாக்க நல்ல பளிச்சுன்னு இருக்காகளா? கீழ் போர்ஷன்லே செவத்த குட்டியை டாவடிக்கனுமா?, சில ஆண்டிகளை பலருக்குத் தெரியாமல் சில நேரங்களில் ரசிக்கனுமா? – இது எல்லாத்துக்கும் ஒரே பதில் இது தான்:- அண்ணா சொன்ன மாற்றான் தோட்டத்து மல்லிகைக்கும் மணம். இதை அவுத்து விட்டு விட்டு நிம்மதியா கடலை போட ஆரம்பிச்சிருவாங்க.. (நான் அப்படி எல்லாம் கிடையாதுங்க.. எந்த வீட்டிலும் குழந்தைகள் தான் எனது நண்பர்கள்)

அண்ணா சொன்னதின் அத்தம் என்ன? எதிர் கட்சியினர் என்பவர் எதிரிக் கட்சியினர் இல்லை. நமக்கு எதிர் அணியில் இருப்பவர். அவர்களில் நல்லவர்கள் வல்லவர்கள் இருப்பார்கள். அப்படி எதிராய் இருப்பதாலேயே அந்தத் திறமைகளை குறைத்துச் சொல்லிவிட முடியுமா என்ன? அவர்களின் திறமைக்கு மரியாதை தரும் கண்ணியமான வாசக வசனம் அது.

ஆனா என்ன நடக்கிறது. எதிரணியினரை விரோதிகளாய் பாக்கும் வழக்கம் வந்து விட்டதே.. ஆய் ஊய் என்றால் வீச்சறுவா தூக்கும் வித்தையை சினிமாக்களும் தொடர்ந்து காட்டி வந்து கெடுக்கின்றன். கேட்டா காதலும் வீரமும் நமக்கு இரு கண்கள் என்று டயலாக் வேறு.. ஆமா எங்கே போய்க்கொண்டிருக்கோம் நாம்?

பக்கத்து வீட்டு வடநாட்டவர் ஒரு கேள்வி கேட்டார். தில்லியில் ஆளும் கட்சி தலைவரும் எதிர் கட்சி தலைவரும் பொது நிகழ்சிகளில் ஒன்றாய் தோன்றுவது போல் தமிழகத்தில் நடக்காதா? என்றார். ரொம்ப விவகாரமான கேள்வி அது. இதுக்கு நான் ஏதாவது சொன்னால் அது அரசியல் ஆகிவிடும். நானும் மழுப்பலாக அப்படி எல்லாம் இல்லையே ராஜாஜி பெரியார், கமல் ரஜனி, எம்ஜிஆர் சிவாஜி இப்படி எல்லாரும் ஒன்றாய் காட்சி தந்திருக்கிறார்களே என்று சொல்ல, கேட்டவர் அடங்கி விட்டார்.

ராஜாஜி, சக்கரவர்த்தி திருமகன் பெயரில் ராம காவியத்தை படைத்தவர். பெரியாரோ, அதே ராமருக்கு செருப்பு மாலை போட்டவர். பாம்பையும் பார்ப்பனரையும் ஒன்றாய் பார்த்தால் பார்ப்பனரை முதலில் விரட்டு என்று சொன்னவர்களின் தலைவரின் நண்பர் தான் ராஜாஜி என்ற பார்ப்பனர். ஆன்மீகவாதி ஒருவர் பெரியாரின் வீட்டில் தங்குவாராம். குளித்தவுடன் அவருக்கு திருநீரை ஏற்பாடு செய்து தந்தாராம் பெரியார். எவ்வளவு பெரிய மனிதர்கள்!!!

காமராஜர் கக்கன் போல் எளிமையின் மறு உருவமாய் வாழ்ந்தவர் தோழர் ஜீவா அவர்கள். அவரின் பெயரில் பரமக்குடியில் ஜீவா படிப்பகம் என்று உள்ளது. அங்கு ஆண் பெண் பலருக்கும் ஜீவா என்று பெயரும் வைப்பர். அவரைப் பற்றி வேறு ஒன்றும் அவ்வளவாய் வெளி உலகிற்குத் தெரியாது. ஆனால் வந்தார் ஒரு கதர் சட்டைத் தமிழர். பட்டி தொட்டி எங்கும், உலகெங்கும் உள்ள மேடைகளில் எல்லாம் ஜீவா பற்றி பேசினார். அந்தமானிலும் கூடப் பேசினார். ஆன்மீகச் சொற்பொழிவில் கூட ஜீவா இடம் பெறத் தவறவில்லை. அந்தப் பேச்சாளர் ஒன்றும் கம்யூனிச கட்சி ஆதரவாளர் அல்ல. மாற்றான் தோட்டத்து மல்லியின் மணத்தை மறுபடி மறுபடி மலரச் செய்த அந்த அபூர்வ மனிதர் தமிழருவி மணியன் அவர்கள்.
எதிரில் இருந்தாலும் எதிரணியில் இருந்தாலும் அவரும் மனிதர் தானே! எதிரியை அழிக்க வேண்டுமா? சுலம்பான வழி ஒன்று உள்ளது. அவரை நண்பனாக்கிக் கொள். இது ஒரு அறிஞர் சொன்னது.

அரசு வேலைக்கு ஆள் எடுத்தோம். எழுத்துத் தேர்வில் ஆள் மாறாட்டம் செய்வதாய் அரசல் புரசலாய் சேதி காதில் விழுந்தது. போட்டோவுடன் வந்து தேர்வு எழுத அழைத்தோம். 10% மக்கள் போட்டோ இல்லாமல் வந்தனர். இதை முன்பே எதிர்பார்த்து கேமிராவும் கையுமாய் ஒரு அரசு ஊழியரை அமர்த்தி, சுடச்சுட போட்டோ எடுத்து (இலவசமாய்) பிரிண்ட் போட்டு கையிலெ குடுத்து, போ பரீட்சை எழுதுப்பா என்றோம். அரசின் கரிசனம் பாத்து மிரண்டே போனார்கள்.

முதியவர் ஒருவர் வந்தார். தன் மகளுக்கு காலையில் வேறு பரீட்சை இருக்கிறது. என்ன செய்ய? என்று. மாலையில் வந்து எழுதலாமே. இதோ பிடிங்க புது ஹால் டிக்கட். நேரம் மாத்தி தர்ரேன் என்று தந்தேன். காலை பரீட்சை இருக்கு என்று சொன்னதுக்கு என்ன ஆதாரம் இருக்கு? என்று கூட அரசு கேட்காதா? என்றார் ஆச்சரியத்துடன். வயதில் பெரியவர். மகளை அழைத்து வராத போதே தெரிகிறது. மகள் அங்கே பரீட்சை எழுதுவது. அவங்க கையில் தான் அந்த ஹால் டிக்கட் இருக்கும். எதுக்கு இதெல்லாம் என்றேன் நான். இஸ்லாமிய பெரியவர் மனம் இளகி முதுகில் தட்டி “அல்லா உங்களுக்கு எந்த குறையும் வைக்க மாட்டார்” என்றார். அவர் சண்டை போட தயாராய் வந்தவர் என்பது இங்கே நான் சொல்லாமல் விட்ட உண்மை.
இப்படித்தான் இராமயணத்திலெ…. அதான் தெரியுமெ.. சீதையை ராவணன் தூக்கினது மாற்றன் தோட்டத்து கதை தானே… ஹலோ.. ஹலோ.. கொஞ்சம் பொறுமையா இருங்க… இந்த மாற்றான் கருத்தையும் கொஞ்சம் கேளுங்க…

நான் சொல்ல வந்தது, இந்திரசித்தன் கதை. அனுமன் களேபரம் செய்து விளம்பர இடைவேளையில் இருக்கும் போது, இந்திரசித்தன் கிளம்புகிறார். எல்லா திசைகளிலும் வெற்றிக்கொடி நாட்டியவன். ஆனா செத்த நேரம் அங்கே இங்கே என்று கிடக்கும் செத்த உடல்களைப் பார்க்கிறார். அட.. அனுமனது பேராற்றல் மிகவும் சிறந்தது என்கிறாராம். கேட்ட பார்ட்டிங்க எல்லாம் ஆடியே போயிட்டாங்களாம். கம்பர் எப்படி மாற்றான் தோட்டத்து மல்லிக்கு பாட்டு எழுதி இருக்கார் பாத்தீகளா??

சென்றனன் என்ப மன்னோ திசைகளோடு உலகம் எல்லாம்
வென்றவன் இவன் என்றாலும் வீரத்தே நின்ற வீரன்
அன்று அது கண்ட ஆழி அனுமனை அமரின் ஆற்றல்
நன்று என உவகை கொண்டான் யாவரும் நடுக்கம் உற்றார்.

மீண்டும் தேடி வருவேன்.